Mae gan Agored Cymru ddyfarniad Lefel 2 newydd, sy’n canolbwyntio ar archwilio bydolygon crefyddol ac anghrefyddol (Bydd y dyfarniad Lefel 1 ar gael cyn hir.)
Lluniwyd y gyfres newydd hon o gymwysterau o’r enw Archwilio Bydolygon ar gyfer dysgwyr 14-16, a’i nod yw helpu i ddatblygu’r sgiliau, yr wybodaeth a’r profiadau sy’n bwysig i bobl ifanc allu byw a gweithio’n llwyddiannus mewn cymdeithas amrywiol sy’n newid yn gyflym. Gall Archwilio Bydolygon gefnogi dull hyblyg o addysg a dysgu Addysg Grefyddol (a Chrefydd, Gwerthoedd a Moeseg) statudol, pan nad yw’r dysgwyr wedi dewis dilyn TGAU Astudiaethau Crefyddol. Fe’i bwriadwyd i fod yn dra gwahanol i’r cymwysterau TGAU, na fydd yn cael eu heffeithio gan y datblygiad hwn.
Mae’r unedau Lefel 2 sydd ar gael erbyn hyn yn cynnwys:
- Deall Bydolwg
- Archwilio fy Mydolwg
- Cwestiynau Mawr
- Moeseg Feddygol
- Moeseg Chwaraeon a Hamdden
- Bydolygon yn fy Nghymuned
Ochr yn ochr â chydweithwyr o awdurdodau lleol Wrecsam ac Abertawe, roedd Canolfan San Silyn yn rhan o gychwyn a chreu’r gyfres newydd hon o gymwysterau er mwyn helpu i gynyddu’r dewisiadau sydd ar gael i ysgolion Wrecsam wrth gyflwyno Addysg Grefyddol (a Chrefydd, Gwerthoedd a Moeseg) statudol.
Ceir gwybodaeth bellach am y cymhwyser hwn yma.