Roedd hi’n fraint i staff Canolfan San Silyn, Libby Jones a Tania ap Siôn, gael lletya Digwyddiad Mewnwelediad Polisi Crefydd, Gwerthoedd a Moeseg (CGM) Llywodraeth Cymru ar ran Cymdeithas CYSAGau Cymru.
Nod y Digwyddiadau Mewnwelediad Polisi ar-lein yw diweddaru rhanddeiliaid â datblygiadau dysgu proffesiynol ar gyfer y Cwricwlwm i Gymru. Cafwyd presenoldeb da yn y Digwyddiad ar 26 Ebrill 2022, oedd yn canolbwyntio ar adnoddau dysgu proffesiynol i CGM, gyda dros 105 yn mynychu.
Cyflwynwyd y sesiwn awr gan Kevin Palmer (Dirprwy Gyfarwyddwr, Addysgeg, Arweinyddiaeth a Dysgu Proffesiynol) a siaradodd am ei ddiddordeb personol a’i gefnogaeth i CGM, a lle pwysig CGM yn addysg dysgwyr heddiw. Dilynwyd hyn gan fideo byr lle clywyd lleisiau eraill am werth CGM a’i le yn y Cwricwlwm i Gymru. Roedd y rhain yn cynnwys y Gwir Barchedig Mary Stallard, y Rhingyll David Smith, Emma Davies (myfyriwr addysg gynradd), a Gareth Hall (siaradwr ar Ddyneiddiaeth i ysgolion a chaplan prifysgol).
Roedd y Digwyddiad yn egluro pam fod angen adnoddau dysgu proffesiynol cenedlaethol i CGM, pwy sydd wedi cymryd rhan yn y prosiect, a’r broses a ddilynir. Rhannwyd manylion am yr adnoddau ac edrychwyd yn fanylach ar rai modiwlau drafft. Roedd cyfle hefyd i’r cyfranogwyr siarad am yr hyn roeddent wedi’u weld a’i glywed o’u safbwyntiau nhw.
Os nad oeddech wedi gallu mynychu’r Digwyddiad neu’n dymuno rhannu’r Digwyddiad ag eraill, cyhoeddwyd recordiad ohono ar Hwb, y gellir ei gyrchu yma.
Bydd yr adnoddau dysgu proffesiynol yn cael eu cyhoeddi ar Hwb yn ddiweddarach y tymor hwn, a byddwn yn rhoi gwybod i chi cyn gynted ag y bydd y rhain ar gael.